4 եւ 5 Փետրուարին Գիտութիւններու ՙԱրարատ՚ Միջազգային Ակադեմիան, որուն հիմնադիր-նախագահն է բժիշկ Յակոբ Գրքիաշարեան, Փարիզի մէջ կը նախաձեռնէ միջազգային 5րդ գիտաժողովի մը, որ նաեւ յոբելինական է:

Տոքթ.- Գրքիաշարեան ծնած է Պէյրութ`1928-ին: Մասնագիտական ուսումը ստացած է Պէյրութի Ֆրանսական Բժշկական համալսարանին մէջ`1953-ին վկայուելով Ֆրանսայի Կրթութեան նախարարութեան տոքթորայի վկայականով: Մասնագիտացած է ընդհանուր եւ ոսկրային վիրաբուժութեան մէջ: 1954-էն 1956 աշխատած է Պէյրութի մէջ`որպէս հիւանդանոցի վիրաբուժապետ: 1969ին Փարիզի համալսարանէն ստացած է փրոֆեսորի տիտղոս: 1974-ին Պէյրութի մէջ հիմնած է Հայկական Բժշկագիտական Միջազգային Ընկերակցութիւնը, որ նոյն թուականին կազմակերպած է համահայկական բժշկագիտական առաջին համագումարը (16 երկիրներէ մասնակիցներով): 1992-ին եղած է ԵՈՒՆԵՍՔՕ-ի մէջ Հայաստանի Հանրապետութեան առաջին ներկայացուցիչ: Հիմնադիրներէն է Արեւմտահայերու Միջազգային Համագումարին:

Հ.- Պարոն Գրքիաշարեան, ե՞րբ ստեղծուեցաւ ՙԱրարատ՚ ակադեմիան:

Պ.- 1986-ին հիմնուեցաւ Փարիզի մէջ`որպէս ոչ շահաբեր, գիտական կազմակերպութիւն:

Հ.- Ի՞նչ նպատակներ կը հետապնդէ:

Պ.- Գլխաւոր նպատակն է զարգացնել գիտութիւնը եւ մշակոյթը ,աշխարհի տարբեր երկիրներուն մէջ գտնուող մեր անդամներուն միջեւ կապեր ստեղծել, օգտակար ըլլալ մեր Մայր Հայրենիք Հայաստանին: Մեր աշխատանքային պաշտօնական լեզուներն են ֆրանսերէն, անգլերէն եւ հայերէն: Այն ատեն կը փորձէինք հայ լեզուն միջազգայնացնել, քանի Հայաստանը տակաւին խորհրդային շրջանի մէջ էր:

Հ.- Ի՞նչ գործունէութիւն կը ծաւալէք:

Պ.- Մեր ակադեմիան կապ ունի աշխարհի բազմաթիւ համալսարաններու հետ: Գիտական ժողովներ ըրած ենք Փարիզ, Լոս-Անճըլըս եւ Երեւան`գլխաւորաբար ճշգրիտ գիտութիւններու ներկայացուցիչներու մասնակցութեամբ:

Հ.- Ներկայիս քանի՞ անդամ ունիք:

Պ.- Մօտաւորապէս 200 անդամ: Բարեկամներ ալ շատ ունինք աշխարհի տարբեր երկիրներու, ինչպէս Ճափոն, արաբական երկիրներ, Գանատա, Միացեալ Նահանգներ եւ Հարաւային Ամերիկայի մէջ: Մեծ մասը համալսարանականներ եւ մշակոյթի մարդիկ են:

Հ.- Քիչ մը կը պատմէ՞ք ձեր յառաջիկայ ծրագիրներուն մասին:

Պ.- Շուտով պիտի նշենք մեր ակադեմիայի հիմնադրման 25ամեակը.- այդ առթիւ երկօրեայ մեծ գիտաժողով մը կազմակերպած ենք, որուն հանդիսաւոր բացումը տեղի պիտի ունենայ 4 Փետրուարին, Փարիզի 9-րդ թաղամասի քաղաքապետարանի սրահին մէջ: Գիտաժողովը նուիրուած է նաեւ հայ տպագրութեան 500-ամեակին, Սայեաթ Նովայի եւ Ժան-Ժագ Ռուսոյի ծննդեանց 300-ամեակին, Ֆրիտեոֆ Նանսէնի ծննդեան 150-ամեակին եւ Հայաստանի վերանկախացման 20-ամեակին:

Հ.- Որո՞նք են զեկուցողները եւ ի՞նչ թեմաներ պիտի արծարծուին:

Պ.- Փրոֆեսորներ կան Օրլէանի, Լիմոժի, Ավինեոնի, Նանթի եւ ֆրանսական այլ քաղաքներու համալսարաններէ, ինչպէս նաեւ Հայաստանէն, Ռուսաստանէն եւ այլ երկիրներէ: Թեմաները կը վերաբերին Հարաւային Կովկասի երկրաբանական ուսումնասիրութեան եւ անոր պատմութեան, Հայաստանի ջրային երկրաբանութեան (hydrogeologie) եւ Սեւանայ լիճին ստորջրեայ հետազօտութեան, ինչպէս նաեւ Երեւանի հին քաղաքատեղիի`Էրեբունիի հնագիտական պեղումներուն վերջին արդիւնքներուն: Այս բոլոր զեկուցումները առաջին օրը`4 Փետրուարին պիտի ընթերցուին:

Հ.- Իսկ երկրո՞րդ օրը:

Պ.- Երկրորդ օրը լեզուաբանական եւ հայագիտական բաժինն է: Մասնակիցները պիտի արծարծեն արեւմտահայերէնի, հայ ինքնութեան, դասական եւ նոր ուղղագրութիւններու առկայութիւնը, ազգային միասնութեան ճամբուն վրայ ուղղագրութեան յարուցած խոչընդոտները, հայ միջնադարեան ձեռագիրներու եւ այլ հայագիտական նիւթերու առընչուող խնդիրներ: Օրինակ հայագէտ Պերնար Ութիէ, որ հին հայկական եւ վրացական ձեռագիրներու նշանաւոր մասնագէտ է, հետաքրքրական զեկուցում մը պիտի կարդայ այդ նիւթին շուրջ:

Հ.- Դրամական աջակիցներ ունի՞ք:

Պ.- Ասկէ առաջ կազմակերպուած միջոցառումներուն ՙԿիւլպէնկեան՚ հիմնադրամը եւ Ամերիկայէն տարբեր հիմնադրամներ կ’աջակցէին, բայց այս անգամ դժբախտաբար որեւէ բան չստացանք: Այնպէս որ մենք մեր իւղով կը տապկուինք (կը ծիծաղի): Քանի որ ես բժշկապետ եմ եւ Շան զ’Էլիզէի վրայ գրասենեակ ունիմ, այնտեղի պանդոկներուն տէրերը ինծի ճանչնալով, իրենց սենեակները տրամադրած են մեր գիտաժողովի հիւրերոն համար:

Հ.- Դուք ալ զեկուցում ունի՞ք:

Պ.- Ես միայն պիտի նախագահեմ բացման նիստին: Արդէն կազմակերպչական աշխատանքները ահռելի ժամանակ եւ եռանդ կը խլեն: Յոյսով եմ, որ մեր ջանքերը ապարդիւն պիտի չելլեն եւ գիտաժողովը ու անոր ընթացքին արծարծուելիք թեմաները պիտի գտնեն իրենց ունկնդիրն ու լսարանը:

Հարցազրոյցը վարեց

ՏՈՐՔ ԴԱԼԱԼԵԱՆ