Չորեքշաբթի օրը յատկանշական էր եւրոպական երկիրներու ֆութպոլի բաժակի մրցաշարքերուն գծով տրուած ըլլալով, որ գագաթի կամ ՙծանր կշիռք՚ի երեք հանդիպումներ կային այդ օր, տուեալ երկիրներու մէջ զօրաւոր խումբերու մասնակցութեամբ:

Այսպէս Սպանիոյ մէջ, թագաւորի բաժակի քառորդ աւարտականի դարձի մրցումին, ախոյեանութեան առաջատար Ռէալ Մատրիտ թէեւ 0-2 հաշուով ետ մնալէն ետք յաջողեցաւ 2-2 արդիւնքով աւարտել խաղը իր ամեհի ու վաղեմի մրցակից Պարսելոնայի դաշտին վրայ, սակայն այդ արդիւնքը բաւար չեղաւ վերջնական յաղթանակ տանելու: Արդարեւ երթի հանդիպումին, Ռէալ իր դաշտին վրայ 1-2 արդիւնքով պարտուած ըլլալով Պարսոյէն, դուրս մնաց բաժակի մրցաշարքէն:

ԻՏԱԼԻԱ

Իտալիոյ մէջ նոյնպէս կայացան քառորդ աւարտականի չորս հանդիպումներ, որոնց գլխաւոր պարտեալը եղաւ երկրին ախոյեանութեան ընդհանուր դասաւորաման 4-րդ դիրքը գրաւող եւ բաժակակիր Ինթէր Միլանը:

Նափոլիի ՙՍան Փաուլօ՚ մարզադաշտին վրայ խաղալով, Ինթէր պարտուեցաւ 2-0 արդիւնքով: Զոյգ կոլերը նշանակեց Նափոլիի ուրուկուէյցի խաղացող Էտիսըն Քավանին, առաջինը  փենալթիի հարուածով, 50-րդ վայրկեանին, իսկ երկրորդը արագ յարձակումէ մը ետք, երբ Ինթէր կը ճնշէր Նափոլիի բերդին վրայ, 90+3-րդ վայրկեանին: Տիտղոսակիր Ինթէր դուրս մնաց բաժակի մրցաշարքէն, իսկ Նափոլի կիսաւարտականի հասաւ 1997-էն ի վեր առաջին անգամ ըլլալով:

Քիեւօ Վերոնա սեփական յարկի տակ խաղալով, 0-1 արդիւնքով պարտուեցաւ Սիենայէն:

Երեքշաբթի օր ախոյեանութեան առաջատար Եուվէնթուս ընդունեց Ա.Էս. Ռոման, որուն դէմ տարաւ փառաւոր յաղթանակ մը 3-0 արդիւնքով: Գեղեցիկ էր Եուվէնի 2-րդ կոլը, զոր նշանակեց ՙծերակուտական՚ Ալեսանտրօ Տէլ Փիերոն, հանդիպման 30-րդ վայրկեանին:

Հինգշաբթի գիշեր Ա. Սէ. Միլան ընդունեց ախոյեանութեան դասաւորման հինգերորդ դիրքը գրաւող մայրաքաղաք Հռոմի միւս ներկայացուցիչ Լացիոն, զոր պարտութեան մատնեց 3-1 արդիւնքով: Հանդիպման 5-րդ վայրկեանին Սիսա նշանակեց Լացիոյի միակ կոլը, իսկ Ռոպինիօ, Սիտորֆ եւ Իպրահիմովիչ 15-րդ,18-րդ եւ 86-րդ վայրկեաններուն արձանագրեցին Միլանի յաղթանակի կոլերը:

ԱՆԳԼԻԱ

Չորեքշաբթի օր Անգլիոյ մէջ կայացան արհեստավարժ ակումբներու բաժակի մրցաշարքի կիսաւարտական հանգրուանին դարձի մրցումները: Տաք եւ հետաքրքրական հանդիպում մը ունեցան ախոյեանութեան առաջատար Մանչեսթըր Սիթին եւ 7-րդ դիրքը գրաւող Լիվըրփուլը վերջինիս դաշտին վրայ: 44590 մարզասէրներու ներկայութեամբ կայացած այս մրցումը աւարտեցաւ 2-2 արդիւնքով հաւասարութեամբ: Երթի մրցումին Մանչեսթըրի մէջ, Լիվըրփուլ յաղթած էր 1-0 արդիւնքով: Հետեւաբար այդ խումբը շահեցաւ աւարտական մրցումին խաղալու իրաւունքը:

Աւարտականին Լիվըրփուլի մրցակիցը պիտի ըլլայ Բ. դասակարգի խումբերէն Քարտիֆ Սիթին, որ փենալթիի հարուածներով (3-1) յաղթեց նոյն դասակարգէն Քրիսթալ Փալասին: 25652 հանդիսականներու առջեւ կայացած հանդիպման հիմնական ժամանակը աւարտեցաւ ի նպաստ Քարտիֆի 1-0 արդիւնքով, ինչ որ երթի մրցումի արդիւնքն է, սակայն Քրիսթալի ի նպաստ: 30 վայրկեաննոց երկարաձգումը բան մը չփոխեց արդիւնքէն եւ երկու խումբերը դիմեցին 11 մեթրանոց հարուածներու, որոնց աւարտին Քարտիֆ յաղթական դուրս եկաւ:

ՃԱՏՐԱԿ

ԼԵՒՈՆ ԱՐՈՆԵԱՆԻ ՅԱՋՈՂ ԵԼՈՅԹՆԵՐԸ ՀՈԼԱՆՏԱՅԻ ՄԷՋ

Ընթացիկ Յունուար ամսուան 14-էն ի վեր, հոլանտական Վէյք Ան Զէէ քաղաքին մէջ կը կայանայ ճատրակի միջազգային 74-րդ մրցաշարքը, որուն կը մասնակցին շախմատի միջազգային 14 աստղեր, որոնց շարքին է նաեւ ողիմպիական ախոյեան, հայրենի ճատրակորդ Լեւոն Արոնեանը, որուն ցարդ գլխաւոր մրցակիցն է նորվեկիացի Մակնուս Քարլսընը:

Մինչ այդ Քարլսըն հերթական իր հանդիպումը ունեցաւ ռուս երիտասարդ շախմատիստ Սերկէյ Քարիաքինին հետ: Մոսկուայէն Հոլանտա մեկնելէն առաջ Քարիաքին ըսած էր, թէ հոն կÿերթայ այս տարուան զօրաւորագոյն մրցաշարքը շահելու նպատակով: Եւ երբ անոր հարցում տրուեցաւ առաջին դիրքը գրաւելու մէջ ձախողելու հաւանականութեան մասին ան պատասխանեց. ՙԱռնուազն պիտի յաղթեմ Քարլսընին՚: Անոր նախատեսութիւնը ճիշդ ելաւ եւ հանդիպման 60-րդ քայլին, 6 ժամուան յարատեւ խաղէ ետք, նորվեկիացին հարկադրուեցաւ անձնատուր ըլլալու իր մրցակիցին:

Հետեւաբար մրցաշարքի 9րդ հանգրուանէն յետոյ Արոնեան 9 կարելիի վրայ 6.5 կէտ շահած ըլլալով, դարձաւ դասաւորման միանձնեայ առաջատար: Յաջորդ երեք դիրքերը 5.5-ական միաւորներով կը գրաւեն Քարլսընը, Վասիլի Իւանչուքը (Ուքրանիա) եւ Թիմուր Ռաճապովը (Ազրպէյճան): Քարիաքին վաստկած է 4.5 կէտ եւ  կը գտնուի 8-րդ հորիզոնականին վրայ: Մրցաշարքի աւարտին մնացած են չորս հանգրուաններ:

ՖՈՒԹՊՈԼԻ ԲԱՐԵԿԱՄԱԿԱՆ ԽԱՂ. ԼԻԲԱՆԱՆ - ԻՐԱՔ  1-0

Անցեալ Կիրակի կէսօրէն ետք Սայտայի  քաղաքապետական դաշտին վրայ, Լիբանանի ֆութպոլի հաւաքականը բարեկամական մրցում մը կատարեց Իրաքի հաւաքականին դէմ, շուրջ 3000 հանդիսականներու ներկայութեամբ: Հանդիպման Ա. կիսախաղը աւարտեցաւ առանց կոլերու, իսկ Բ. կիսախաղին Լիբանան կարողացաւ առաւելութեան հասնիլ իր հիւրին նկատմամբ, երբ 65-րդ վայրկեանին Մահմուտ Ալի կոլ նը նշանակեց  Իրաքի փոխարինող բերդապահ Նուր Սապրիի դարպասէն ներս: Այս միակ կոլով ալ Լիբանան յաղթանակ տարաւ իր մրցակիցին նկատմամբ:

Այս հանդիպումը կÿընդգրկուէր երկու խումբերուն նախապատրաստութեանց ծիրէն ներս`2014-ին Պրազիլի մէջ կայանալիք Մոնտիալի ասիական զտումներու երրորդ հանգրուանի իրենց մրցումները կատարելու, որոնք պիտի կայանան յառաջիկայ 29 Փետրուարին: Նշենք, որ Լիբանան այդ օր կարեւոր մրցում մը պիտի կատարէ Արաբական Միացեալ Էմիրութեանց հաւաքականին դէմ Ապու Տապիի մէջ, իսկ Իրաք պիտի մրցի Սինկափուրի հետ: