Անցեալ շաբաթավերջին կայացան Եւրոպական երկիրներու ֆութպոլի ազգային ախոյեանութեանց մրցաշարքերու հերթական հանգրուաններու մրցումները: Առաջատար խումբերը մեծամասնութեամբ յաղթանակներ տանելով կա՛մ ամրապնդեցին իրենց դիրքերը եւ կամ պահեցին մրցակիցներու միջեւ կէտերու տարբերութիւնները:

Մեր մարզասէր ընթերցողներուն կը ներկայացնենք ֆութպոլի մարզաձեւին մէջ կարեւորութիւն եւ հետաքրքրութիւն ներկայացնող երկիրներուն ախոյեանութեանց մրցումներուն արդիւնքները եւ առաջատար խումբերուն դասաւորումները:

ԻՏԱԼԻԱ

Շաբաթ եւ Կիրակի օրերուն տեղի ունեցան Իտալիոյ ախոյեանութեան 2011-2012 մրցաշրջանի ընդհանուր 19-րդ եւ երթի վերջին հանգրուանին մրցումները, որոնց ընթացքին արձանագրուեցան 31 կոլեր, ինչ որ կը նկատուի արդիւնաւէտ շաբաթ մը կոլերու իմաստով: Երկու խումբեր նշանակեցին հինգական կոլեր, ինչպէս նաեւ արձանագրուեցան երեքէն չորս կոլերու տարբերութեամբ երկու յաղթանակներ:

Կատարուած մրցումներուն արդիւնքները.-

- Ա.Էս.Ռոմա   Զեզենա             5-1

 - Աթալանթա  Եուվենթուս                    0-2

- Պոլոնիա         Փարմա              0-0

- Քալիարի        Ֆիորենթինա                  0-0

- Իւտինեզէ        Քթանիա                           2-1

- Լեչէ                   Քիեւօ Վերոնա              2-2

- Սիենա                        Նափոլի                  1-1

- Փալերմօ         Ճենովա             5-3

- Նովարա                          Ա. Սէ .Միլան 0-3

- Ինթէր Միլան               Լացիօ                2-1

Երթի շրջանի աւարտին, առաջատար խումբերուն դասաւորումը կը ներկայացնէ հետեւեալ պատկերը.-

                1) Եուվենթուս`       19 մրցում- 41 կէտ, կոլեր`  31-12

                2) Ա. ՍԷ. Միլան`      19-40,  40-17

                3) Իւտինեզէ`          19-38,  28-14

                4) Ինթէր Միլան`     19-35,  30-20

ՍՊԱՆԻԱ         

Սովորականին նման մրցակցութիւնը կը շարունակուի սպանական ֆութպոլի երկու հսկաներուն` Ռէալ Մատրիտի եւ Պարսելոնայի միջեւ: Առաջինը 4-1 արդիւնքով պարտութեան մատնեց իր հիւրը` Աթլեթիք Պիլպաուը, իսկ երկրորդը նոյն արդիւնքով առաւելութեան հասաւ զինք հիւրընկալած Մալակայի նկատմամբ:

Մրցակցութիւնը կը շարունակուի նաեւ զոյգ խումբերու գլխաւոր կոլ-սքորըրներ Քրիսթիան Ռոնալտոյին (Ռէալ) եւ Լիոնէլ Մեսսիին (Պարչելոնա) միջեւ, որոնք յաջորդաբար 2 եւ 3 կոլեր նշանակեցին այս շաբաթ: Ռոնալտօ (Փորթուկալէն) այժմ ունի 23 կոլեր, իսկ Մեսսի (Արժանթինէն) մէկ կոլով ետ կը մնայ անկէ:

Ռէալ Մատրիտ 19-րդ հանգրուանէն (երթի շրջանին վերջինը) ետք շահած է 49 կէտ (կոլերը` 67-18), իսկ Պարչելոնա ունի 44 կէտ (59-12): Վալենսիա (35 կէտ, կոլերը` 29-20) եւ Լեւանթէ 31 կէտ (կոլերը` 25-22), հեռուէն կը հետեւին Ռէալի եւ Պարչելոնայի միջեւ պայքարին:

ԱՆԳԼԻԱ

Երկար տարիներէ ի վեր առաջին անգամ ըլլալով, Անգլիոյ ֆութպոլի ախոյեանութեան տիտղոսին տիրանալու համար սուր պայքար մը կÿընթանայ Մանչեսթըր քաղաքի զոյգ ներկայացուցիչներուն` Եունայթըտին եւ Սիթիին միջեւ, եւ առ այժմ կացութիւնը ի նպաստ երկրորդին է:

Կիրակի օր մրցաշարքի 22-րդ օրուան մրցումներու աւարտին, առաջատար Մանչեսթըր Սիթի 3-2 արդիւնքով առաւելութեան հասաւ իր հիւրին` Թոթընհէմին (3րդ դիրքը կը գրաւէ) նկատմամբ: Երթի մրցումին, Լոնտոնի մէջ, Սիթի յաղթած էր 5-1 արդիւնքով: Իսկ Եունայթըտ Լոնտոնի մէջ խաղալով, 2-1 արդիւնքով պարտութեան մատնեց Արսենալը, որ երթին 8-2 անհաւատալի արդիւնքով տեղի տուած էր նոյն խումբին առջեւ Մանչեսթըրի մէջ:

Շաբաթ օր Չելսի առանց կոլերու հաւասարութիւն մը արձանագրեց Նորիչ Սիթիի դաշտին վրայ, մինչ երկրին անուանի խումբերէն Լիվըրփուլ 3-1 արդիւնքով պարտուած վերադարձաւ Պոլթըն Ուոնտըրըրզի դաշտէն:

Երկու Մանչեսթըրները լաւ առաւելութեամբ հեռու են զիրենք հետապնդող խումբերէն: Սիթի ունի 54 կէտ (կոլերը` 60-18), իսկ Եունյթըտ 51 կէտ (կոլերը` 54-21:

Մայրաքաղաք Լոնտոնի երեք ներկայացուցիչներ` Թոթընհէմ, Չելսի եւ Արսենալ, յաջորդաբար 46,41 եւ 36 կէտերով կը գրաւեն 3-րդ, 4-րդ եւ 5-րդ դիրքերը ու ըստ երեւոյթին անոնք պիտի պայքարին երրորդ դիրքը գրաւելու համար:

ԳԵՐՄԱՆԻԱ

Նախորդ տարիներուն նման, Գերմանիոյ ֆութպոլի ախոյեանութեան մրցաշարքը արձակուրդ առած էր ձմեռնային օրերուն, եւ անոր ՙգնացքը՚ վերստին շարժեցաւ այս շաբաթավերջին, երբ կայացան դարձի շրջանի առաջին` ընդհանուր 18-րդ հանգրուանին մրցումները:

Ուրբաթ օր 18-րդ հանգրուանի առաջին մրցումին, ախոյեան եւ ընթացիկ մրցաշրջանի առաջատար Պայերն Միւնիխ նոր ՙապտակ՚ մը ստացաւ վաղեմի իր մրցակից Պորուսիա Մէօնշեն կլատպախէն, որ 3-1 արդիւնքով կարեւոր յաղթանակ մը տարաւ իր հիւրին դէմ: Պորուսիա Տորթմունտ, որ 3 կէտով ետ կը մնար Պայերնէն անմիջապէս  օգտուեցաւ իր մրցակիցի սայթաքումէն, Կիրակի օր 5-1 մեծ արդիւնքով յաղթանակ մը տանելով Համպուրկի դաշտին վրայ: Նոյնը ըրաւ նաեւ 3-րդ դիրքը գրաւող Շալքէն, որ Շաբաթ օր 3-1 արդիւնքով պարտութեան մատնեց իր հիւրը` Շթութկարթը:

18-րդ օրուան մրցումներու արդիւնքներուն լոյսին տակ, առաջատար խումբերուն դասաւորումը կը պարզէ հետեւեալ տեսքը.-

                1) Պայերն Միւնիխ`          18 մրցում- 37 կէտ, կոլեր` 44-13

                1) Պորուսիա Տորթմունտ`    18-37, 40-13

                3) Էֆ. Սի. Շալքէ`                18-37, 41-23

                4) Պորուսիա Մէօն`              18-36, 28-12

ՖՐԱՆՍԱ

Շաբաթավերջի երեք օրերուն կայացան Ֆրանսայի բաժակի մրցաշարքի երկրորդ հանգրուանին մրցումները, ուր Օլիմփիք Լիոն հանդիպման 74-րդ եւ 89-րդ վայրկեաններուն նշանակուած կոլերով, 2-0 արդիւնքով դժուարին յաղթանակ մը տարաւ չորրորդ դասակարգի խումբերէն Սթատ Լուսոնի դէմ եւ անցաւ մրցաշարքի երրորդ հանգրուան:

Ախոյեանութեան առաջատար Փարի Սէն Ժերման 4-0 արդիւնքով յստակ յաղթանակ մը տարաւ հինգերորդ դասակարգի խումբերէն Սապլիէ Սիւր Սարթի դէմ: Նիսի եւ Սթատ Ռէնի հանդիպումը աարտեցաւ առանց կոլերու, եւ յետ երկարաձգման կատարուած ՓԵՆԱԼԹԻԻ հարուածներով երկրոդ խումբը յաղթանակ տարաւ 5-4 արդիւնքով: Օլիմփիք Մարսէյ յետ երկարաձգման 3-1 արդիւնքով յաղթանակ տարաւ երկրորդ դասակարգի խումբերէն Հաւրի նկատմամբ:

Այս էջը պատրաստեց` ԶՕՀՐԱՊ ՏԷՕՔՄԷՃԵԱՆ