Մարդու արեան խումբը կը համարուի այն բանալին, զոր գիտնալով կրնանք կրահել անհատի մը առանձնայատկութիւնը, որպէսզի պահպանենք անոր առողջութիւնը, երկարակեցութիւնը, Ֆիզիքական աշխուժութիւնն ու մարմնի կշիռքի կարքաւորումը առանց որեւէ սննդականոնի հետեւելու: Ամէն անգամ երբ որոշ տեսակի եւ քանակի սնունդ ընկալենք մարմնին մէջ յատուկ քիմիական փոխազդեցութիւն կը յառաջանայ յատկապէս արեան բջիջներու եւ սնունդի բաղադրութիւններուն միջեւ: Այս իրադարձութիւնը տեղի կունենայ մեր նախնիներէն ստացած ժառանգական տուեալներու շնորհիւ, որոնցմէ սննդանիւթերը մարսելու ընդունելութիւնը կը փոխանցուի: Մարդիկ որոնք կեանքի ընթացքին իրենց արեան համապատասխան սնունդի հետեւած են, ոչ միայն յաջողած են իրենց կշիռքը առանց սննդականոնի կանունաւորել, այլ նաեւ կրցած են բազմաթիւ երկարատեւ հիւանդութիւներ կանխարգիլել: Ուտելիքները ընդհանրապէս զանազան խումբերու կը բաժնուին: Կան չէզոք սննդամթերքները, որոնք պէտք է օգտագործել քիչ քանակով եւ ոչ յաճախ: Արգիլուած սնունդը չի նշանակեր, թէ օգտագործման պարագային կը յառաջացնէ թունաւորում կամ որեւէ նկատելի փոփոխութիւն է` այլ ան կը նպաստէ աւելորդ կշիռքի յաւելման եւ որոշակի հիւանդութիւններու նախատրամադրուածութեան:

Օ ԽՈՒՄԲ.

Այս արեան խումբը անենահինը կը նկատուի: Օ խումբին պատկանող անհատներուն համար փրոթէյինը հիմնական սնունդը կը նկատուի: Անոնց համար մսեղէնները հիմնական սննդական կենսանիւթ կը նկատուին: Առաւելաբար, անոնց համար Ֆիզիքական աշխատանքը հիմնական է, որովհետեւ երբ Ֆիզիքական աշխատանք կատարեն անոնք աւելի առողջ կը զգան: Անոնք ստամոքսի բարձր թթուայնութիւն կ?ունենան եւ զօրաւոր մարսողական համակարգ: Այս անհատները թայրոյտ հորմոնի անբաւարարութեան հետեւանքով գիրութենէ, հեղուկի կուտակումէ եւ յոգնութեն կը տառապին: Իրենց յարմարագոյն ուտելիքը ոչխարի եւ կովու միսն է, ինչպէս նաեւ հաւու լիարդն ու կենդանիներու երիկամը: Անհրաժեշտ է խուսափիլ խոզի միսէն, խոզի ապուխտէն, կաթնեղէնէն ու հաւկիթէն: Օգտակար է փրոթէյինով հարուստ կաթն ու պանիրը: Այս խումբին պատկանող կիները քալսիումի պէտք ունին: Պէտք է նարինջի, կաղամբի եւ խնձորի հիւթերէ, ելակ, խնձորի քացախ, սմբուկ, սունկ, ձիթապտուղ, գետնախնձոր, սեւ եւ սպիտակ պղպեղէ եւ քէչափէ խուսափիլ: Օգտակար են նաեւ այոտինով հարուստ ուտելիքները` ինչպէս սալմոնը, սարտինը, կարմիր ձուկը, մասուրը եւ կանաչ բանջարեղէններէն հազարը, կարմիր կաղամբը, պրոքոլին, շոմինը, պամեան, սոխը եւ ազատքեղը: Թոյլատրելի է ուտել ընկոյզ, նուշ, կաղին, սիսեռ, կանաչ լուբիայ, մեղր եւ տուրմ:

A ԽՈՒՄԲ. Այս խումբի պատկանողները եղած են առաջին հողագործութեամբ զբաղողները ապա առաջին բուսակերները: Անոնց ինքնապաշտպանութեան համակարգը զգայուն է եւ յաճախ շաքարախտի ու քաղցկեղի հիւանդութիւններէ տառապելու երթակայ են: Ճիշտ սննդականոնի հետեւելով անոնք կրնան այս հիւանդութիւններէ փրկուիլ: Անոնց համար բուսականութիւնը յարմարագոյն ուտելիքն է: Անոնք դիւրութեամբ միսն ու կաթը չեն կրնար մարսել: Նախընտրելի է ձուկ կամ հաւ ուտել: Այս խումբին պատկանողները քիչ իւղի պէտք ունին: Միսի փոխարէն կրնան ուտել նուշ, ընկոյզ եւ խուսափիլ սիսեռէն, կարմիր չոր լուբիայէն, կանաչ դարմ լուբիայէն, կանաչ պղպեղէն, լոլիկէն, նարինջէն եւ գետնախնձորէն: Անոնք հացահատիկը եւ ոսպի տեսակները մարսելու դիւրութիւն ունին:

B ԽՈՒՄԲ. Այս խումբին պատկանողները մարդկային ցեղախումբերու գաղթի հետեւանքով յառաջացած են: Անոնք ունին բարձր պաշտպանողական համակարգ եւ լաւ մարսողութիւն: Սակայն անոնք ջղային եւ մորթային հիւանդութիւններէ կը տառապին: Յաճախ այս անձերը ոսպի տեսակներ, կորեկ եւ հնդկացորեն ուտելով կը գիրնան որովհետեւ իրենց մարմնին մէջ ջուր կը կուտակեն, ապա մարմնին կշիռքը կաւելցնեն: Նիհարնալ փափաքողները ցորենի եւ ոսպի արտադրութիւններէ պէտք կը խուսափին: Կշիռքի նուազման կը նպաստեն կանաջ բանջարեղէնները, յատկապէս գառնուկի եւ հորթի միսը, ու հաւկիթը: Անոնք մշտական յոգնածութեան զգացումէ կը տառապին: Անոնց չի վնասեր կարագը, դեղին պանիրներն ու քրէմ Ֆրէշը:

AB ԽՈՒՄԲ.

Այս խումբի պատկանող անհատները խառն ամուսնութիւններէ յառաջացած են: Անոնց կշիռքի բարձրացման կը նպաստեն վատ մարսուող եւ ճարպի պէս կուտակուող կարմիր միսը, որ յետագային մարսողութեան հարցեր կրնայ ստեղծել: Անոնց սնունդին մէջ նախընտրելի է գործածել ոչխարի, գառնուկի եւ հնդկահաւի միսեր, Ֆեթա պանիր, ձիթապտուղի ձէթ, շագանակ, ընկոյզ, սմբուկ, կաղամբ, սալորի տեսակներ, սխտոր, անանաս, խաղող եւ կանաչ թէյ: Պէտք է նաեւ խուսափիլ գունաւոր պղպեղ, նարինջ, արմաւ, մանկօ, նուռ եւ պանան ուտելէ: Այս խումբի անձերու կշիռքի նուազման կը նպաստեն ծովային ուտելիքները, կաթնամթերքները եւ կանաչ բանջարեղէնները:

Այս էջը պատրաստեց` ԴԱԼԱՐ ՏԷՐ ՎԱՐԴԱՆԵԱՆ