ՍԱՆԱԱ (Եմէն)

Եմէնի նոր վարչապետ դարձաւ ընդդիմութեան առաջնորդ Մոհամմատ Պասինդուան: Համապատասխան հրամանագիրը ստորագրեց Եմէնի փոխ նախագահ Ապտ Ռապպօ Մանսուր ալ Հատին: Պասինդուանը Եմէնի ապստամբութեան առաջնորդներէն է, այժմ կը պատրաստուի ձեւաւորել անցումային կառավարութիւնը, որ պիտի ղեկավարէ երկիրը մինչեւ 2012-ի Փետրուար ամիսը, երբ տեղի պիտի ունենայ արտահերթ նախագահական ընտրութիւն: Ան Սալեհի կառավարութեան ժամանակ եղած էր երկրին արտաքին գործոց նախարարը, սակայն 2001-ին լքած էր իշխող իշխանութիւնը ու անցած ընդդիմութեան կողմը: Յիշեցնենք որ 23 Նոյեմբերին, շուրջ 9 ամիս շարունակուող յուզումներէն յետոյ, Եմէնի նախագահ Ալի Ապտալլա Սալեհ ստորագրած էր Ծոցի արաբական երկիրներու խորհուրդի նախաձեռնած համաձայնագիրը, որով իշխանութիւնը կը փոխանցէր երկրի փոխ նախագահին, փոխարէնը ստանալով անկախութեան յստակ երաշխիքներ: Իշխանութեան փոխանցումը դրական արձագանք գտաւ Արեւմուտքէն:

ՊԱՆՔՈԿ (Թայլենտ)

Թայլենտի վարչապետ Եինկլակ Չխնավատին փոխադրուեցաւ Պանքոկի հիւանդանոցներէն մէկը` սննդային թունաւորումի ախտորոշմամբ: Կառավարութիւնը այլ մանրամասնութիւններ չհաղորդեց այս ուղղութեամբ: Միայն յայտնի է, որ վարչապետին մասնակցութեամբ 29 Նոյեմբերին տեղի ունեցած կառավարութեան նիստը վարեց անոր տեղակալը:

ԳԵՐՄՈՒՇ (Պատմական Հայաստան)

Թրքական կառավարութեան որոշումով Շանլըուրֆայի հայկական Գերմուշ (Կարմուճ) գիւղն ու այդ գիւղին մէջ գտնուող հայկական եկեղեցին յայտարարուեցաւ զբօսաշրջիկութեան գօտի: Այս լուրը նշուած է Թուրքիոյ մշակոյթի եւ զբօսաշրջիկութեան նախարարութեան Շանլըուրֆայի նահանգային վարչութեան կողմէ տարածուած հաղորդագրութեան մէջ: Թրքական “Հապէր” լրատուամիջոցը կը նշէ, որ հայկական գիւղն ու եկեղեցին զբօսաշրջիկութեան գօտի վերածելու մասին նախաձեռնութեամբ հանդէս եկած է երկրին մշակոյթի եւ զբօսաշրջիկութեան նախարարութիւնը, իսկ նախարարներու խորհուրդը հաւանութիւն տուած է այդ նախաձեռնութեան:

ՊՐԻՒՔՍԷԼ (Պելճիքա)

Պելճիքայի Նոր Ֆլաման Միութիւն կուսակցութեան երկու անդամներ, երկրի խորհրդարանին յղած են դիմում մը, ուր կը պահանջուի ազատ արձակել Թուրիքոյ մէջ վերջին քանի մը շաբաթներուն ընթացքին ձերբակալուած քրտամէտ գործիչները, որոնց մէջ կան մեծ քաղաքապետներ եւ քիւրտ ղեկավար Ապտալլահ Օճալանի փաստաբանները: Երեսփոխանները նաեւ կը պահանջեն, որ հիմնուի “ճշմարտութեան ու համաձայնութեան յանձնախումբ” մը, ուր իր դերակատարութիւնը պիտի ունենայ Օճալանը եւ կը շեշտեն, թէ քրտական տագնապին լուծումը պէտք է նախապայման դառնայ Թուրքիոյ Եւրոպական Միութեան անդամ դարձնելու գործընթացքի: Անոնք նաեւ կը շեշտեն, թէ Քիւրտիստանի Աշխատաւորական Կուսակցութիւնը ոչ թէ ահաբեկչական կազմակերպութիւն է, այլ քիւրտերու իրաւունքները պաշտպանող քաղաքական կուսակցութիւն, եւ կը պնդեն, թէ Թուրքիա բնակող 14 միլիոն քիւրտ ժողովուրդին պէտք է տրուի փոքրամասնութեան կարգավիճակ:

ԹԻՖԼԻՍ (ՎՐԱՍՏԱՆ)

29 Նոյեմբերին նախագահ Սահակաշվիլին Հայաստանի նախագահ Սերժ Սարգսեանի Վրաստան այցելութեան առթիւ յայտարարած է, որ հայ-վրացական յարաբերութիւնները ոչ միայն բարեկամական են, այլեւ գործնական: “Մեր յարաբերութիւններուն մէջ որեւէ խնդիր չկայ: Մեզի համար կենսականօրէն կարեւոր է, որ Հայսատանը դառնայ ինքնուրոյն, վստահ եւ ուժեղ երկիր, որ նաեւ Վրաստանի յուսալի գործընկերն է: Վրաստանի նախագահը նաեւ նշած է, որ հայ-վրացական յարաբերութիւններու բարելաւումը այս տարիներուն բացառիկ է, ոչ մէկ բախում ունեցած են հայեր եւ վրացիներ ցարական թէ խորհրդային տարիներուն իսկ: Միայն վերջին տարուան ընթացքին 600 հազար հայաստանցի քաղաքացիրներ կտրած են Վրաստանի սահմանը: Այդ կը նշանակէ, որ Հայաստանի բնակչութեան զգալի մասը կ՛օգտուի հայ-վրացական սահմանէն:

ՓԷՅՃԻՆԿ (Չինաստան)

Չինաստանի իշխանութիւնները գիւղական շրջաններու բնակիչներու համար աղքատութեան նոր վիճակ սահմանած են: Այսուհետեւ ծայրայեղ աղքատութեան մէջ ապրողներ կը համարուին անոնք, որոնց եկամուտը օրական մէկ տոլարէն պակաս է կամ 6.5 Եուան: Անցեալ տարուայ տուեալներու համաձայն Չինաստանի նահանգներու մէջ ծայրայեղ աղքատութեան մէջ կ՛ապրէին 27 միլիոն չինացիներ: Վերոնշեալ նորարարութիւնը միլիոնաւոր մարդոց թոյլ կու տայ պետական նպաստներ եւ արտօնեալ վարձկեր ստանալ անվճար եւ մասնագիտական դասընթացքներ յաճախել: Միջազգային հանրութիւնը Չինաստանին յաճախ կը քննադատէ աղքատութեան ցածորակ չափանիշ ունենալու համար: Այժմ արդէն Չինաստանը առաւելագոյն չափով կը մօտենայ համաշխարհային դրամատան սահմանած ցուցանիշին, որուն համաձայն օրական աշխատավարձքի նուազագոյն թոյլատրելի չափ կը համարուի 1.25 տոլարը:

ԼՈՆՏՈՆ (Անգլիա)

Հանրայայտ Հէրի Փոթըրի դերակատար Տէնիէլ Ռիտգլիֆ կրկին կը գլխաւորէ մինչեւ 30 տարեկան անգլիացիներու ամենահարուստ 30 աստղերու ցուցակը: Անոր դրամագլուխը կը գնահատուի 51.8 միլիոն սթերլինկ (80 միլիոն տոլար): Անոր եկամուտները նախորդ տարուան համեմատ աւելցած են մէկ միլիոն սթերլինկով: “Հէրի Փոթըր” ֆիլմի 21 եւ 23 ամեայ դերասաններ Էմմա Ուսթսոնը եւ Ռոպերթ Կրետը նոյնպէս յայտնուած են առաջին հնգեակի մէջ: Անոնք կը գրաւեն աղիւսակի 4-րդ եւ 5-րդ տեղերը, համապատասխանբար 23.9 եւ 21.7 միլիոն սթերլինկ հարստութեամբ: Երկրորդ տեղն է 26 ամեայ դերասանուհի Կերա Նայթլին 30.9 միլիոն սթերլինկ հարստութեամբ: Երրորդ հորիզոնականը “Մթնշաղ” ֆիլմի 25-ամեայ դերասան Ռոպերթ Փաթինսընը` 24.9 միլիոնով: Այս օրերուն Անգլիոյ մէջ հարստանալու միակ երաշխաւորումը դերասանութեան մէջ է... դժբախտաբար:

ԳԱՌՆԻ