Հանրապետութեան նախագահ Միշէլ Սըլէյման Պաապտայի նա֊խագահական պալատին մէջ ընդունեց լիբանանեան բանակի ընդ֊հանուր հրամատար զօրավար Ժան Քահուաժին եւ անոր հետ քըն֊նարկեց երկրին ապահովական եւ այլ հարցեր:

Հանրապետութեան նախագահ զօր. Միշէլ Սլէյման երէկ, 2 փետրուար 2012-ին ընդունեց Հաղորդակցութեան միջոցներու միջազգային համադաշնակցութեան մէկ պատուիրակութիւնը՝ ընկերակցութեամբ՝ հաղորդակցութեան միջոցներու նախարար Նիքոլա Սահնաուիի: Հանդիպումին ընթացքին, քննարկուեցան հաղորդակցութեան միջոցներու նախարարութեան վերաբերող հարցեր, ինչպէս նաեւ լիբանանեան հաղորդակցութեան ցանցին մէջ իսրայէլեան գաղտնի լսումներուն վերաբերող հարցեր:

Վարչապետ Նեժիպ Միքաթի երէկ, 2 փետրուար 2012-ին նախագահեց Թրիփոլիի նաւահանգիստը ընդարձակելու ծրագիրին գործադրութեան յատուկ ձեռնարկին: Իր խօսքին մէջ Միքաթի ըսաւ, « Եթէ ոմանք համոզուած են, որ մենք պիտի հրաժարինք, ապա անոնք պէտք է իմանան, որ մենք երկրին ծառայելէ պիտի չհրաժարինք: Սակայն արդէն ժամանկն է, որ կառավարութիւնը ըլլայ ներդաշնակ, պատասխանատու, ազդու եւ արդիւնաւէտ իր գործունէութեան մէջ»:

Կառավարութեան գումարած նիստին ընթացքին նախագահ Սըլէյ֊ման շեշտեց, որ անհրաժեշտ է լիբանանցի քաղաքացիներուն առօրեային վերաբերող հարցերը չքաղաքականացնել, այլ անոնց յարմար լուծումներ գտնել:

Լիբանանի մէջ Եւրոպական Միութեան դեսպան Անժելինա Էխհորեսթ յայտնեց, որ անհրաժեշտ է էական կարեւորութիւն ներկայացնող նիւթերը միացեալ ձեւով քննարկել եւ Լիբանանը շրջանային իրարանցումներէն զերծ պահել՝ ընդգծելով, որ լիբանանեան իշխանութիւնները զգաստ են եւ ամէն ջանք ի գործ կը դնեն կանխարգիլելու եւ հակակշռի տակ առնելու համար որեւէ «ժայթքում»:

Արաբ կնոջ օրուան առիթով, նախագահ Սլէյման երէկ, 2 փետրուար 2012-ին յայտնեց, որ ժողովուրդներուն եւ պետութիւններուն երթին մէջ անհրաժեշտութիւն է կնոջ աշխուժ մասնակցութիւնը՝ բոլոր մարզերուն մէջ: Ան նշեց, որ Լիբանան եղած է առաջին պետութիւններէն, որ յարգած է կիներուն իրաւունքը, մինչդեռ արաբական կարգ մը այլ երկիրներ տակաւին այս իմաստով թերացումներ կ՛արձանագրեն: Նախագահը կոչ ուղղեց կիներուն ներխուժելու քաղաքական մարզ, առաջադրելու իրենց թեկնածութիւնը եւ փաստելու իրենք զիրենք՝ ազգային կեանքին եւ պատասխանատուութեան մէջ եւս:

Խորհրդարանի նախագահ Նեպիհ Պըրրի երէկ, 2 փետրուար 2012-ին խորհրդարանին մէջ ընդունեց շարք մը երեսփոխաններ: Հանդիպումին ընթացքին Պըրրի յայտնեց, որ ինք կը սերտէ այն կարելիութիւնը, որ Լիբանանը կեդրոն կը դարձնէ շրջանային մակարդակի բոլոր երկխօսութիւններուն:

Վարչապետ Նեժիպ Միքաթի երէկ, 2 փետրուար 2012-ին վարչապետարանին մէջ ընդունեց Լիբանանի մէջ Եգիպտոսի դեսպան Մոհամետ Մուսթաֆա Թուֆիքը, որուն հետ քննարկեց երկկողմանի յարաբերութիւնները: