Մարատա հոսանքի ղեկավար, երեսփոխան Սլէյման Ֆրենժիէ երէկ, 16 յունուար 2012-ին Պնաշհիի մէջ ընդունեց Լիբանանի մէջ Մեծն Բրիտանիոյ դեսպան Թոմ Ֆլեչըրը, որուն հետ քննարկեց լիբանանեան իրադարձութիւնները: Հանդիպումէն ետք Ֆլեչըր նշեց, որ ինք լաւատես է, որ լիբանանեան բանակը 2012-ին իր գերիշխանութիւնը պիտի պարտադրէ ամբողջ Լիբանանի տարածքին:

Հանրապետութեան նախագահ զօր. Միշէլ Սլէյման երէկ, 16 յունուար 2012-ի երեկոյեան ժամը 4:30-ին, Պաապտայի մէջ նախագահեց կառավարութեան գումարած նիստին, որուն ներկայ գտնուեցաւ նաեւ վարչապետ Նեժիպ Միքաթի: Նիստին ընթացքին քննարկուեցան Էշրէֆիէի Ֆասսուհ շրջանին մէջ փուլ եկած շէնքին թղթածրարը եւ 2012-ի պետական պիւտճէի նախագիծը: Առ այդ, կառավարութիւնը որոշեց իւրաքանչիւր զոհի տրամադրել 30 միլիոն լ. ոսկի:

Լիբանանի վարչապետ Նեժիպ Միքաթի յայտարարած է, որ Լիբանան իրաւունք ունի օրինական ճամբով վերադարձնել Իսրայէլի կողմէ գրաւուած տարածքները: Այս մասին հաղորդած է «Արմենփրես»-ը: «Բարեփոխումներ եւ ժողովրդավարացում» միջազգային քոնֆերանսի ընթացքին, Միքաթի նշած է, որ դեռեւս Իսրայէլի տարածքին կը գտնուին լիբանանեան որոշ տարածքներ, եւ այս փաստը Իսրայէլ չընդունիր:

Արտաքին գործոց նախարար Ատնան Մանսուր եւ անոր ընկերակցող պատուիրակութիւնը՝ իմամ Մուսա Սատըրի զաւակը՝ Սատրէտտին Սատըր եւ շէյխ Մոհամետ Եագուպի զաւակը՝ նախկին երեսփոխան Հասան Եագուպ, շաբաթավերջին շարունակեցին լիպիացի պատասխանատուներուն հետ իրենց ունեցած հանդիպումները: Իմամ Մուսա Սատըրի եւ անոր ընկերակիցներուն անհետացման թղթածրարը քննարկելու շրջագիծին մէջ, Մանսուր հանդիպում մը ունեցաւ Լիպիոյ արդարութեան նախարար Ալի Ահմիտա Աշուրի հետ:

Ներքին գործոց նախարար Մարուան Շարպել MTV-ի հետ հեռաձայնային հաղորդակցութեան ընթացքին յայտնեց, որ քաղաքացիական պաշտպանութեան ուժերը, Կարմիր խաչն ու ապահովական ուժերը ամէն ջանք ի գործ կը դնեն փրկելու համար փուլ եկած շէնքին բնակիչները: Նախարար Շարպել յայտնեց, որ դժբախտաբար լիբանանցին աղէտը պատահելէն ետք միայն կը մտածէ իր առնելիք քայլերուն մասին:

Երէկ, 15 յունուար 2012-ի երեկոյեան Էշրէֆիէի Ֆասսուհ շրջանի «Մըթրան Աթալլա» փողոցին վրայ գտնուող եօթը յարկանի շէնքը փուլ գալով պատճառեց զոհեր եւ վիրաւորներ: Փլատակներուն տակէն դիակներ գտնելու աշխատանքը տակաւին կը շարունակուի:

Նախկին վարչապետ Սաատ Հարիրի համացանցային «Թուիթըր» ընկերային ցանցին մէջ իր ունեցած զրոյցին ընթացքին նշեց, որ Լիբանանի մէջ քաղաքացիական պատերազմի հաւանականութիւն չկայ, որովհետեւ քաղաքական բոլոր ուժերուն ղեկավարութիւնները պատերազմին դէմ են: Ազգային երկխօսութեան մասնակցութեան ակնարկելով՝ Հարիրի յայտնեց, որ ապարդիւն է մասնակցիլ երկխօսութեան մը, որուն ընթացքին կարելի պիտի չըլլայ երկրին պաշտպանութեան իմաստով ազգային որեւէ ռազմավարութեան յանգիլ:

Հանրապետութեան նախագահ զօր. Միշէլ Սլէյման ընդունեց լիբանանեան-սուրիական գերագոյն խորհուրդի ընդհանուր քարտուղար Նասրի Խուրին, որուն հետ քննարկեց երկկողմանի յարաբերութիւններն ու ստորագրուած համաձայնագիրները գործադրելու հեռանկարները, ինչպէս նաեւ Սուրիոյ իրադարձութիւնները:

Թուրքիոյ արտաքին գործոց նախարար Ահմեթ Տաւութօղլու շաբաթ, 14 յունուար 2012-ի առաւօտեան ժամանեց Լիբանան, ուր հանդիպումներ ունեցաւ իշխանութեան երեք պետերուն, քաղաքական տարբեր ուժերու եւ լիբանանցի հոգեւոր պետերու հետ, ինչպէս նաեւ իր մասնակցութիւնը բերաւ ՄԱԿ-ի կազմակերպած խորհրդաժողովին:

ՄԱԿ-ի ընդհանուր քարտուղար Պան Քի Մուն երէկ, 15 յունուար 2012-ի առաւօտեան «Ֆենիսիա» պանդոկին մէջ նախագահեց ՄԱԿ-ի կազմակերպած «Արաբական երկիրներուն մէջ գործադրուելիք բարեկարգումներն ու ժողովրդավարութիւնը» խորհրդաժողովին՝ ներկայութեամբ վարչապետ Նեժիպ Միքաթիի: Իր խօսքին մէջ, Միքաթի մաղթեց, որ ՄԱԿ աւելի արդար ըլլայ իր որդեգրած բանաձեւերուն մէջ եւ անոնց գործադրութեան պարագային: