Ընդառաջելով Լիբանանի կառավարութեան հրաւէրին՝ ՄԱԿ-ի ընդհանուր քարտուղար Պան Քի Մուն երէկ, 13 յունուար 2012-ին, կէսօրէ ետք ժամը 2:00-ին ժամանեց Լիբանան: Քի Մունի կ՛ընկերակցին Միջին Արեւելքի մէջ ՄԱԿ-ի ընդհանուր քարտուղարի պատուիրակ Թերի Ռոտ Լարսըն եւ հարաւային Լիբանանի մէջ ՖԻՆԻՒԼ-ի միջազգային խաղաղապահ ուժերու հրամանատար զօր. Ալպերթօ Ասարթա:

Խորհրդարանի նախագահ Նեպիհ Պըրրի երէկ, 12 յունուար 2012-ին, Այն Թինէի մէջ ընդունեց վարչապետ Նեժիպ Միքաթին, որուն հետ քննարկեց լիբանանեան քաղաքական բեմը յուզող հարցերը:

Լիբանանցի քաղաքացիին աշխատավարձը սրբագրելու նպատակով, աշխատանքի նախարար Շարպել Նահհաս երէկ, 12 յունուար 2012-ի յետմիջօրէին նախագահեց ընդարձակ նիստի մը, որուն մասնակցեցան Տնտեսական խորհուրդները, Աշխատաւորական ընդհանուր համադաշնակցութիւնը, Սենտիքայական աշխատանքները համադրող խորհուրդը եւ Ապրուստի սղաճի համեմատութիւնը ճշդող յանձնախումբը: Նիստէն ետք կատարուած յայտարարութիւններուն հիման վրայ յստակ դարձաւ, որ աշխատավարձերը սրբագրելու բանակցութիւնները հասած են զերօ կէտին:

Վարչապետ Նեժիպ Միքաթի երէկ, 12 յունուար 2012-ին, վարչապետարանին մէջ հովանաւորեց ներքին ապահովութեան ուժերու վարուելակերպին նուիրուած օրէնքի յատուկ հրատարակութեան ներկայացման ձեռնարկին՝ ներկայութեամբ ներքին գործերու նախարար Մարուան Շարպելի եւ ներքին ապահովութեան ուժերու ընդհանուր տնօրէն զօր. Աշրաֆ Ռիֆիի: Միքաթի ընդգծեց, որ ամէն ջանք ի գործ կը դրուի Լիբանանի մէջ քաղաքական կայունութիւնը ամրապնդելու նպատակով, որովհետեւ քաղաքական կայունութեան շնորհիւ է, որ կարելի կ՛ըլլայ լիբանանեան քաղաքացիական անվտանգութիւնը ապահովել:

ՄԱԿ-ի ընդհանուր քարտուղար Պան Քի Մուն այսօր, 13 յունուար 2012-ին պաշտօնական այցելութեամբ մը կը ժամանէ Լիբանան:

Հանրապետութեան նախագահ զօր. Միշէլ Սլէյման երէկ, 12 յունուար 2012-ին, նախագահական պալատին մէջ ընդունեց ՄԱԿ-ի մէջ Լիբանանի մնայուն ներկայացուցիչ Նաուաֆ Սալամը, որուն հետ քննարկեց ՄԱԿ-ի ընդհանուր քարտուղար Պան Քի Մունի Լիբանան կատարելիք այցելութեան վերջնական նախապատրաստութիւնները, ինչպէս նաեւ ՄԱԿ-ի եւ լիբանանեան կողմին միջեւ քննարկուելիք թղթածրարները:

Ընկերվար-ժոողվրդավար կուսակցութեան պատասխանատուներէն, նախարար Ղազի Արիտի այսօր յայտարարեց, որ իր կուսակցութիւնը նախանձախնդիր է պահպանելու Հըզպալլայի հետ գործակցութիւնը` ի սէր Լիբանանի մէջ կայունութեան պահպանման:

Խորհրդարանի նախագահ Նեպիհ Պըրրի երէկ, 11 յունուար 2012-ին, խորհրդարանին մէջ կայացած հանդիպումին ընթացքին շեշտեց, որ աշխատավարձերը սրբագրելու թղթածրարին լուծումը պէտք է ապահովել Աշխատաւորական ընդհանուր համադաշնակցութեան եւ տնտեսական խորհուրդներուն միջեւ գոյացած համաձայնութեան հիման վրայ:

Նախկին վարչապետ Օմար Քարամէ «Նահար» օրաթերթին հետ իր ունեցած հարցազրոյցին ընթացքին կոչ ուղղեց աւելի յանդուգն որոշումներ տալու՝ հանրութեան տրամադրուած ծառայութիւններն ու ժողովուրդին ապրուստը բարելաւելու համար:

Վարչապետ Նեժիպ Միքաթի երէկ, 11 յունուար 2012-ին, վարչապետարանին մէջ ընդունեց Լիբանանի մէջ Միացեալ Նահանգներու դեսպան Մորա Քոնելլին, որուն հետ քննարկեց Լիբանանը յուզող իրադարձութիւնները, ինչպէս նաեւ լիբանանեան-ամերիկեան յարաբերութիւնները: