Շաբաթ օր Մոսկուայի Պոլոթնայա հրապարակին վրայ ռուսական ընդդիմութեան կատարած «Յանուն ազնիւ ընտրութիւններու» կարգախօսով հանրահաւաքի ընթացքին, Ռուսիոյ իշխանութիւններուն ուղղուած պահանջներ բովանդակող բանաձեւ մը որդեգրուած է:

«Ազատութիւն» ձայնասփիւռի կայանին ռուսական ծառայութիւնը կը հաղորդէ, որ փաստաթուղթին մէջ ընդգրկուած կէտերու շարքին են` անցեալ տարուան 4 Դեկտեմբերին տեղի ունեցած խորհրդարանական ընտրութիւններու արդիւնքներուն չեղեալ յայտարարումը, մէկ ամիս ետք տեղի ունենալիք նախագահական ընտրութիւններուն Եապլոքօ կուսակցութեան հիմնադիր Կրիկորի Եաւլինսքիի թեկնածութեան արձանագրումը եւ քաղաքական բանտարկեալներու ազատ արձակումը:

Ըստ կազմակերպիչներուն հաւաքին մասնակցած է առնուազն 120 հազար մարդ, իսկ ըստ ներքին գործոց նախարարութեան, ոչ աւելի քան 36 հազար: Ընդդիմութեան հաւաքէն ետք Մոսկուայի մէջ քայլարշաւ տեղի ունեցած է:

Նոյն օրը Մոսկուայի Փոքլոննայա Կորա շրջանին մէջ հանրահաւաք կատարեցին նաեւ իշխանութեան կողմնակիցները: Ըստ ոստիկանութեան այդ հաւաքին մասնակիցներուն թիւը 138 հազար է, իսկ «Ազատութիւն» ձայնասփիւռի կայանի թղթակիցին համաձայն, այդ թիւը խիստ չափազանցուած է:

Ի պաշտպանութիւն արդար ընտրութիւններու այլ հաւաք մը տեղի ունեցած է Մոսկուայի Սախարով պողոտային վրայ: Այս հաւաքին մասնակցած է շուրջ 150 հոգի: