Թուրքիոյ արտաքին գործոց նախարար Ահմետ Տաւուտօղլու ըսաւ, թէ Իրանի վրայ որեւէ յարձակում ողբերգական պիտի ըլլայ եւ Իրանի աթոմական ուժանիւթի հարցին շուրջ տարակարծութիւնը կարելի է արագօրէն լուծել աւելցնելով, որ «եթէ քաղաքական զօրաւոր կամք եւ փոխադարձ վստահութիւն ըլլայ, այս հարցը քանի մը օրերու ընթացքին կարելի պիտի ըլլայ լուծել: Արհեստագիտական տարակարծութիւնը մեծ չէ, հարցը փոխադարձ վստահութեան եւ քաղաքական ուժեղ կամքի մէջ է»:

Տաւուտօղլու այս ելոյթը ունեցաւ Միւնիխի մէջ կայացած Ապահովութեան համագումարին, որ ապահովութեան բարձրաստիճան պատասխանատուներ եւ դիւանագէտներ ի մի բերած էր: Ան աւելցուց. «Զինուորական ընտրանքը ողբերգութիւն պիտի յառաջացնէ մեր շրջանին մէջ, հետեւաբար այս ողբերգութենէն առաջ բոլորը պէտք է լրջանան բանակցութեանց մէջ: Կը ցանկանք, որ կողմերը կրկին շուտով հանդիպին, սակայն այս անգամ պէտք է ամբողջական արդիւնք ըլլայ»:

Միւս կողմէ Թեհրանի մէջ Յեղափոխական Պահակագունդի փոխ-հրամանատար Հիւսէյն Սալամի յայտարարեց, թէ Իրան պիտի յարձակի որեւէ երկրի վրայ, որուն հողերը Իրանի թշնամիները կ՛օգտագործեն իր վրայ յարձակում կատարելու:

Միացեալ Նահանգներ եւ Իսրայէլ Իրանի դէմ զինուորական յարձակում մը անհաւանական չեն նկատեր, եթէ դիւանագիտութիւնը ձախողի տագնապը լուծելու: Նախապէս ալ Իրան յայտնած էր, թէ խիստ կերպով պիտի պատասխանէ ամերիկեան եւ իսրայէլեան որեւէ յարձակման ու Հորմուզի ջրանցքը պիտի փակէ նաւարկութեան առջեւ, եթէ Արեւմտեան երկիրները աւելի եւս տնտեսական պատժամիջոցներ կիրառեն իր դէմ: