Եմէնի հարաւը սպաննուած են «Ալ Քաիտա» ահաբեկչական կազմակերպութեան 15 ապստամբներ: Ինչպէս կը հաղորդէ «Արմենփրես»-ը, վկայակոչելով արաբական aljadeed.com-ը, ինքնաթիռները յարձակած են Եմէնի հարաւը գտնուող Ապհինի շրջանի Լաուտեր քաղաքի արեւելեան հատուածին վրայ: Լրատուամիջոցները տեղեկացուցած են, որ սպանուածներէն 4-ը «Ալ Քաիտա»-ի ղեկավարներէն են:

Եւրոմիութիւնը անհանգստացած է Իրանի մէջ լրագրողներու նկատմամբ կիրարկուող հալածանքներէն: Ինչպէս կը հաղորդէ «Արմենփրես»-ը, յայտարարած է ԵՄ-ի դիւանագիտութեան ղեկավար Քեթրին Էշթընը: ԵՄ-ի դիւանագիտութեան ղեկավարը կոչ ուղղած է Իրանի իշխանութիւններուն՝ անյապաղ ազատել վերջին շաբաթներուն անվտանգութեան ուժերու կողմէ ձերբակալուած լրագրողները:

Օտար ժխտողական պետութեան կողմէ ճնշումը պէտք չէ խանգարէ մարդու իրաւունքներու պաշտպանութեան եւ Ֆրանսայի մեծութեան դրսեւորման համար: Այս մասին այրտայայտուած է Ֆրանսայի Ազգային Ժողովի պատգամաւոր Վալերի Պուայէն: «Ես մեծ տխրութեամբ ընդունեցի օրինագիծը Սահմանադրական խորհուրդ տեղափոխելու մասին լուրը, սակայն կ՛ընդունիմ, որ անիկա իմ գործընկերներուս իրաւունքն է», գրած է Պուայէն «ֆէյսպուք»-ի իր էջին վրայ:

Թուրքիոյ գլխաւոր ընդդիմադիր «Ժողովրդա-հանրապետական» կուսակցութեան պատգամաւոր Էնսար Օղութը մեկնած է Հայաստանի հետ սահմանակից Արտահանի նահանգին մէջ գտնուող Չըլտըր լիճ, եւ նոյն վայրէն դիմած է Սարքոզիին: Թրքական Milliyet-ի փոխանցումով, թուրք պատգամաւորը Սարքոզիին դիմելով «Այս լեռներուն այն կողմը Հայաստանն է: 1918-էն սկսեալ, մենք հայերուն հետ հարեւան ենք եւ խաղաղութեան ու եղբայրութեան մէջ կ՛ապրինք: Այնպիսի բարեկամութիւն կայ, որ նոյնիսկ մեր սահմանին փշաթել չկայ: Եկո՛ւր, այստեղէն նստինք կառք եւ մեկնինք Հայաստան եւ այնտեղ տեսնենք, թէ ինչպէ՞ս մենք կ՛ապրինք մեր հայ բարեկամներուն հետ»:

Ֆրանսացի այն ծերակուտականները, որոնք ստորագրած են Սահմանադրական խորհուրդ ուղարկուած ցեղասպանութիւններու ժխտումը քրէականացնող օրինագիծին դէմ դիմումը, Թուրքիոյ ազդեցութեան տակ են: Այս մասին News.am-ի թղթակիցին յայտնած է տարածաշրջանային պատգամաւոր Հիլտա Չոպոյեանը: Իր խօսքով, այս դիմումը կը վկայէ Ֆրանսայի ներքաղաքական կեանքին վրայ՝ Թուրքիոյ ազդեցութեան մասին: «Թուրքիոյ դեսպանը անձամբ նամակով դիմած է օրինագիծին դէմ քուէարկած բոլոր ծերակուտականներուն՝ կոչ ընելով հաւաքել անհրաժեշտ թիւով ստորագրութիւններ՝ Սահմանադրական խորհուրդ դիմելու համար», ըսած է Չոպոյեան՝ աւելցնելով, որ այդ դիմումը անբնական է եւ թրքական ազդեցութեան արդիւնք է:

Սուրիացի ընդդիմադիր առաջնորդ Պուրհան Ղալիուն մամլոյ հարցազրոյցի մը ընթացքին ըսաւ, որ սուրիական ընդդիմութիւնը երաշխիքներ տուած է Ռուսիոյ` Սուրիոյ մէջ իր զինուորական կայաններու պահպանման վերաբերեալ:

Ռուսիոյ արտաքին գործոց նախարար Ս. Լավրով հաւաստեց, որ Ապահովութեան Խորհուրդը որեւէ ժամանակ Սուրիոյ մէջ զինուորական միջամտութիւն լիազօրող որոշում պիտի չընդունի:

ՄԱԿ-ի Ապահովութեան խորհուրդը իր այսօրուան նիստին կը քննարկէ Սուրիոյ շուրջ արաբական-արեւմտեան բանաձեւը: Արաբական լիկայի ընդհանուր քարտուղար Նեպիլ Արապի եւ Քաթարի վարչապետ Համատ պըն Ժասեմ պըն Ժապըր Ալ Թանի մեկնեցան Նիւ Եորք` Սուրիոյ հարցով արաբական նոր նախաձեռնութիւնը Ապահովութեան խորհուրդին ներկայացնելու համար:

Թուրքիոյ Ազգային մեծ ժողովի նախագահ Ճէմիլ Չիչէք յայտարարած է, թէ իբր «Ատրպէյճանի գրաւուած» տարածքները ազատագրելու եւ ատրպէյճանցի փախստականներուն վերադարձը «Հայրենի հողեր» ապահովելու համար անհրաժեշտ է հզօրացնել միջազգային ճնշումը Հայաստանի վրայ: Չիչէք նաեւ նշած է, թէ ԼՂ հիմնախնդիրի, ինչպէս նաեւ իսլամական երկիրներուն առնչուող այլ հակամարտութիւններու լուծման գործին մէջ իսլամական երկիրները պէտք է միաւորուին:

Սահմանադրական խորհուրդը կրնայ անվաւեր համարել ցեղասպանութիւններու ժխտումը քրէականացնող օրինագիծը, որ հակասահմանադրական կը համարուի, եթէ իրեն դիմած են 60 պատգամաւոր, 60 ծերակուտական, պետութեան ղեկավարը, Ազգային ժողովի կամ ծերակոյտի նախագահը: Սահմանադրական խորհուրդին դիմելը կը կասեցնէ օրէնքի ուժ դառնալու գործընթացը: