Լիբանանի հայ առաքելական, կաթողիկէ եւ աւետարանական յարանուանութիւններէն, հայ քաղաքական երեք կուսակցութիւններէն, ինչպէս նաեւ Լիբանանի Հայ դատի մարմինէն եւ Հայոց ցեղասպանութեան 100-ամեակի Լիբանանի կեդրոնական մարմինէն ներկայացուցիչներ երէկ, 18 յունուար 2012-ին, այցելեցին Լիբանանի մէջ Ֆրանսայի դեսպանատուն, ուր հանդիպում ունեցան Լիբանանի մէջ Ֆրանսայի դեսպանի առաջին խորհրդական Տիտիէ Շապերի եւ դեսպանի երկրորդ խորհրդական Սելին Փլասի հետ՝ Հայոց Ցեղասպանութեան ժխտումը քրէականացնող օրինագիծին առչութեամբ:

Նախագահ Սերժ Սարգսեան, Ռուսիոյ նախագահ Տմիթրի Մետվետեւի հրաւէրով, Յունուար 23ին աշխատանքային այցով պիտի մեկնի Սոչի: Այցի ծիրէն ներս նախատեսուած է Հայաստանի Հանրապետութեան եւ Ռուսաստանի Դաշնութեան նախագահներու երկկողմ հանդիպում: Նոյն օրը տեղի պիտի ունենայ նաեւ Հայաստանի, Ռուսաստանի եւ Ատրպէյճանի նախագահներու եռակողմ հանդիպում` նուիրուած Լեռնային Ղարաբաղի հակամարտութեան կարգաւորման:

Սփիւռքի նախարար Հրանոյշ Յակոբեան յայտարարեց, որ վերջին տարուան ընթացքին Հայաստանի քաղաքացիութիւն ստացած է շուրջ 30.000 սփիւռքահայ:

Հ.Հ. անկախութեան եւ Հայոց բանակի 20-ամեակին նուիրուած, Արցախեան պատերազմին մասին պատմող «Եթէ բոլորը» ֆիլմը 27 յունուարին կը ցուցադրուի շարժապատկերի սրահներէն:

Հայաստանի Հանրապետութեան վարչապետ Տիգրան Սարգսեանի որոշումով Ռուբէն Մելիքեան նշանակուած է Հայաստանի Հանրապետութեան արդարադատութեան նախարարի տեղակալ:

Հրանդ Տինքի ընտանիքի փաստաբան Ֆեթհիէ Չեթին քննադատած է դատարանի վճիռը՝ ըսելով, որ անիկա կը նշանակէ, որ «քաղաքական սպանութիւններու պետական աւանդութիւն»-ը միտումնաւոր կերպով անփոփոխ մնաց, քանի որ ան չ՛առնչուիր 2007-ի Տինքի սպանութեան պետութեան ներգրաւման վերաբերեալ մեղադրանքներուն:

Ըստ թրքական «Թուտէյզ Զաման» պարբերականին, Հրանդ Տինքի գործով միւս մեղադրեալ Էրհան Թունչել արդարացուած է սպանութեան գործով, սակայն մեղաւոր ճանչցուած է 2004-ի Պոլսոյ պայթիւնը կազմակերպելու գործին մէջ ունեցած դերին համար եւ դատապարտուած 10 տարուան բանտարկութեան:

Պոլսոյ առաջին ատեանի 14-րդ դատարանը «Ակօս» թերթի խմբագրապետ Հրանդ Տինքի գործով ցմահ բանտարկութեան դատապարտած է գլխաւոր մեղադրեալ Եասին Հայալը:

89 տարեկանին վախճանած է ֆրանսական շարժանկարի եւ թատրոնի դերասանուհի Ռոզի Վարդը: Դերասանուհին մահացած է Յունուար 14ին, սակայն անոր ամուսինը` Փիեռ Պատել, նոր հաստատած է տխուր լուրը: Ռոզի Վարդ, որուն իսկական անունը Նուարդ Մանուէլեան՝ Թուրքիոյ մէջ ծնած հայուհի էր:

Հայաստանի արտաքին գործերու նախարարութիւնը կապ հաստատած է Հարաւային Սուտանի մէջ գտնուող Հ.Հ. քաղաքացիին հետ: Այս մասին յայտնած է Հայաստանի արտաքին գործերու նախարարութեան մամուլի քարտուղար Տիգրան Բալայեանը: Վերջինիս խօսքով, Հայաստանի քաղաքացին ազատութեան եւ անվտանգութեան մէջ է, եւ այդ երկրի իշխանութիւնները որեւէ խնդիր չունին անոր հետ: